Húsmóðirin ég sjálfur !

Þar sem ég hef ekki verið duglegur við bloggfærslur þá hefur ýmislegt á daga mína drifið frá því síðasta færsla sá dagsins ljós. Ekki það að vinnan hafi verið að drepa mig nema þá úr leiðindum. Nei ég er kominn með nýtt starfsheiti og það er "húsmóðirin ég sjálfur" hingað til hefur mér tekist af alkunnri snilld að smjúga framhjá óvini mínum númer eitt á heimilinu og það er þvottavélin, í hátt í 25 ár hef ég getað notað þann frasa á konuna mína að "þvottavélin sé það eina sem ég vilji og geti ekki lært á og það sé betra fyrir alla aðila að ég sé ekkert að læra á hana". Í síðustu viku bar svo við að konan mín heittelskuð þurfti að fara í aðgerð á spítala og var ekki heima alla vikuna og viti menn þvotturinn þvoði sig ekki sjálfur eins og ég hef haldið hingað til það þarf að flokka hann og setja hann í þvottavélina, setja þvottaefni í vélina og mýkingarefni allt í þar til gerð hólf sem reyndar liggur ekkert ljóst fyrir um hvað eigi að fara hvar og svo hefst höfuðverkurinn og það er að stilla vélina á rétt hitastig sem er ekki eins auðvelt og mig grunaði ! Hvernig stendur á því að ekki er hægt í dag að framleiða föt sem öll mega fara í sömu vélina á sama hitastigi ég bara spyr. Eftir miklar pælingar komst heimilisfólkið að því að líklega væri minna betra þ.er að þvo allt á minnsta hita og virðist það vera ágætis ráð nema með suðuþvottinn, hvítu sokkarnir af syninum sem ótrúlegt en satt voru ekkert sérstaklega hvítir höfðu ekki þvegist neitt sérstaklega vel á 30 gráðu hita og nú voru góð ráð rándýr hér þurfti auðsjáanlega fagleg ráð frá húsmóðurinni og viti menn og konur eftir að hafa þvegið þetta allt aftur á réttum hita þá leit þetta bara ágætlega út og þá var komið að því að hengja upp þvottinn ! úps þetta er ekki eins auðvelt og það lítur út í fyrstu en þetta bjargast en ég er ekki vissum að betri helmingurinn sé neitt endilega ánægður með klemmuförin í öllu á "vitlausum" stöðum. Ég held reyndar að þetta sé allt að koma og þökk sé þurkaranum sem er þarfaþing á hverju heimili. Næsta raun mín var að þrífa baðherbergin og hér dugðu engin vetlingatök með 2 fullorðna karlmenn á heimilinu og dömuna ásamt tengdasyninum eins og alvöru húsmæðra er siður var allt þrifið hátt og lágt og klósettburstinn notaður óspart með þeim afleiðingum að ég að sjálfsögðu var búinn að rispa salernisskálina að innan með efri hluta burstans sem er úr krómuðu Járni og á víst að umgangast af varúð ! Nú voru góð ráð dýr þar sem að það er ekki fallegt að sjá rispur um allt klósett. Ég sem gamall bílakall mundi eftir því að ég átti þennan forláta lakkmassa úti í bílskúr og því voru settir upp hanskarnir og kafað í klósettið með massanum og viti menn, klósettið eins og nýtt að innan og þá upphófust tilraunir um allt salernið, baðkarið, sturtubotninn og að ég tala ekki um blöndunartækin allt er þetta eins og nýtt í dag og vonandi helst það þannig ????? Nú er mín heittelskaða komin heim og því er hún aftur orðin yfirvaldið í húsmóðurstörfunum og eða verkstjóri þar sem hún má ekkert gera næstu fimm vikurnar og því kemur það í minn hlut að framkvæma það sem fyrir mig er lagt en þar sem mér finnast tilraunir skemmtilegar þá er ekki loku fyrir það skotið að "húsmóðirin ég sjálf" eigi eftir að prófa einhverjar óhefðbundnar aðferðir í djobbinu. Jæja nú er mál að linni, ég er farinn að hugsa upp matseðil kvöldsins og í kvöld verða ekki pulsur og bakaðar baunir heldur einhver veislumáltíð uppúr matreiðslubók Sigga Hall. Ps. ég og Betty Crocker erum orðnir vinir eftir helgina þar sem við kokkuðum saman eina tertu eða svo.

KV. Tótinn

Athugasemdir

[Jón Birgir Valsson, 8.4.2008 kl. 23:45]

Hahaha. Þetta er snilldar pistill. Einhvern tíman er allt fyrst þó eftir fertugt sé. Þekki þetta bögg með klemmu förin. Hef aldrei skilið ,,point-ið" hjá konunni minni með það. Er ekki bara aðalmálið að koma þvottinum á snúrurnar til þerris???